दिशानिर्देश समाचार
महेन्द्रनगर, ११ बैशाख
भारतमा रोजगारीका लागि गएका व्यक्ति फर्कने क्रमसँगै कञ्चनपुर कोरोना भाइरस संक्रमणको उच्च जोखिमा परेको छ । भारतीय शहरमा कोरोनाका कारण बन्दाबन्दी हुन थालेपछि सीमा नाका हुँदै भारतबाट फर्कनेको संख्या दिनहुँ बढिरहेको छ । भारतबाट फर्केका मध्ये अधिकांशमा कोरोना भाइरस संक्रमण देखा पर्न थालेको छ । यस अवस्थामा नागरिक आफै सचेत र सजग हुन जरुरी छ ।
त्यसैगरी कोरोना भाइरसको संक्रमणको जोखिम बढ्न थालेपछि जिल्ला प्रशासन कार्यालय कञ्चनपुरले सार्वजनिकस्थलमा २५ भन्दा बढी व्यक्ति जनमघट हुनमा रोक लगाएको छ । जिल्ला सुरक्षा समिति र जिल्ला कोभिड–१९ संकट व्यवस्थापन केन्द्रको बैठकले जनस्वास्थ्यका मापदण्ड कडाइका साथ पालना गर्नका लागि बुधबारदेखि लागू गरिएको थियो । तर मापदण्ड अनुसार कार्याव्यन भएको देखिदैन ।
२६ सय बढी कोरोना संक्रमित थपिए
पछिल्लो २४ घण्टामा देशभर २६ सय १९ जनामा कोरोनाभाइरस संक्रमण पुष्टि भएको छ । यस्तै १४ को मृत्यु भएको छ । स्वास्थ्य तथा जनसंख्या मन्त्रालयका अनुसार ८ हजार ६६८ जनामा परीक्षण गर्दा २६१९ जनामा संक्रमण पुष्टि भएको हो । पीसीआर विधिबाट ७ हजार ५२५ जनामा परीक्षण गर्दा २४८६ र एन्टिजेन विधिबाट ११४८ जनामा परीक्षण गर्दा १३३ जनामा संक्रमण पुष्टि भएको हो ।
यससँगै देशभर कोरोनाभाइरस संक्रमितको कुल संख्या २ लाख ९७ हजार ८७ र निको हुनेका कुल संख्या २ लाख ७७ हजार १२३ पुगेको छ । हालसम्म मृतकको कुल संख्या ३१३६ पुगेको पनि मन्त्रालयले जनाएको छ ।
कञ्चनपुरका २ जना कोरोना संक्रमितको मृत्यु
कञ्चनपुरका थप २ जना कोरोना संक्रमितको मृत्यु भएको छ । महाकाली प्रादेशिक अस्पतालमा उपचाररत भीमदत्त नगरपालिका–१८ का ४० वर्षीय पुरुष र वडा नम्बर ४ की ५० वर्षीया महिलाको सेती प्रदेशिक अस्पतालमा मृत्यु भएको स्वास्थ्य कार्यालय कञ्चनपुरले जनाएको छ ।
एक हप्ता अगाडी भारतको इन्दौरबाट फर्किएका पुरुषलाई गत बिहीवार अस्पताल भर्ना गरिएकोमा शुक्रबार उनको कोरोना रिपोर्ट आएको थियो ।
त्यसपछि आईसियूमा राखेर उपचार गर्दा शुक्रबार दिउँसो १ बजेतिर उनको मृत्यु भएको अस्पतालका कोभिड सम्पर्क व्यक्ति डा. गोविन्द रोकायाले बताए । यस्तै संक्रमित महिलालाई बिहीबार उपचारको लागि सेती प्रादेशिक अस्पताल लगिएकोमा शुक्रबार उनीमा कोरोना पुस्टि भएको थियो ।
योसँगै सुदूरपश्चिम प्रदेशमा कोरोनाबाट मृत्यु हुनेकाृ संख्या ६१ पुगेको सुदूरपश्चिम स्वास्थ्य निर्देशनालय राजपुुर डोटीले जनाएको छ ।